Pas reshjeve të shiut që shkaktuan përmbytje në shumë qytete, java që lamë pas ka sjellë në vendin tonë temperatura shumë të ulëta dhe reshjet e para të dëborës.
Mëngjesin e sotëm meteorologu Hakil Osmani i MeteoAlb për emisionin “Ditë e Re” në RTV Ora ka treguar se java që vjen do të sjellë një mot të larmishëm ku nuk do të mungojnë as reshjet e pakta të borës në zonat malore. Sipas tij përmirësimi i motit pritet vetëm pas të mërkurës, teksa parashikohet se prej të enjtes do të rikthehen reshjet e shiut dhe temperaturat do të rriten.
“Ditën e mërkurë pritet të kemi prezencë të vranësirave të cilat ditën e enjte do të sjellin reshje të pakta shiu dhe dëbore në skajin verior dhe jugor. E premtja dhe fundjava do të sjellin reshje shiu kryesisht në pjesën më të madhe të ultësirës perëndimore dhe shfaqje të reshjeve të dëborës në zonat malore.
Kjo javë do të jetë e larmishme pasi do të kemi në fillimin e saj mot të ftohtë por të kthjellët pastaj do të mbyllet me temperatura më të ngrohta duke bërë që miniumet të shkojnë -2 gradë celsius në zonat malore ndërsa maksimumi jo më shumë se 12 gradë celsius. Fundjava që vjen sjell një rritje të vlerave termike, por zonat verilindore dhe juglindore kryesisht ato malore mbeten të rrezikuara nga reshjet e pakta të dëborës” – thotë ai.
