Ish-deputeti i PD-së, Luçiano Boçi tha sot se qeveria nuk ka asnjë plan për nisjen e vitit të ri shkollor.
Në reagimin e tij të mërkurën, Boçi tha se qeveria është mjaftuar me publikimin e rregullave antiCovid që duhet t’i nënshtrohen nxënësit dhe tre skenarëve me sens telenovele.
“Paketë financiare nuk ka. As dhe paketë masash konkrete. Dhe pa këto, protokollet e sigurisë mbeten vetëm në letër, pa garancinë e zbatimit rigoroz dhe janë fiktive. Shkollat në pjesën dërmuese, janë të degraduara fizikisht dhe kushtet e tyre higjeno-sanitare, i shërbejnë më shumë virusit se sa nxënësve. Përgjatë kësaj kohe, nuk u mor asnjë ndërhyrje rregulluese. Asnjë investim i bërë dhe asnjë i parashikuar. Ndërkohë, klasat në shkollat e populluara, nuk janë shtuar dhe zhvillimi me turne, duke e shtrirë mësimdhënien në kohë, rrit rrezikun e përhapjes dhe ul përkujdesin e stafeve mësimore”, tha ai.
Po ashtu, Boçi tha se protokollet që të realizohen, kërkojnë një mbështetje financiare për nxënësit dhe mësuesit.
“Maskat njëpërdorimëshe rrisin kostot e shkollës në masë të papërballueshme për familjet shqiptare. Ndërsa mjetet mësimore dhe didaktike, duhen rifreskuar në frekuencë të shpeshtë. Por qeveria nuk e ka në plan të harxhojë lekë për nxënësit e mësuesit. Në shumë pika rregullat janë krejt të pazbatueshme, sidomos me nisjen e motit të ftohtë, sepse shkollat janë pa sisteme ngrohje e në gjendje fizike mjerane. Klasat duhet të pajisen me banka njëvendëshe, për të siguruar distancën”, tha ai.
