Sali Berisha ka akuzuar sërish Lulzim Bashën për pazare me Edi Ramën. Në një video mesazh në rrjetet sociale para takimit të thirrur me anëtarësinë e PD në Fier, Berisha thotë se ky është momenti për të shpëtuar të ardhmen e partisë dhe sovranitetin e saj. Një ditë para Berishës, anëtarësinë dhe drejtuesit e degës së PD në Fier i takoi edhe Lulzim Basha.
Ish-kryeministri Sali Berisha ka publikuar një video në rrjetet sociale pak orë para takimit të njoftuar me anëtarësinë e Partisë Demokratike në qytetin e Fierit, në vijim të “Foltores” kundër vendimit të Lulzim Bashës për përjashtimin e tij nga grupi parlamentar demokrat.
Në rrjetet sociale, Berisha postoi videon nga data 10 shtator, kur iu drejtua mbështetësve që ishin grumbulluar në hyrje të Parlamentit.
“Një përshëndetje të përzemërt të dashur miq me këtë video të një momenti historik, të mbrojtjes së sovranitetit të zgjedhësve, parlamentit dhe vendit! Rroftë Shqiperia,” shkruan Berisha.
Dhe duke marrë shkas nga takimi me demokratët e Fierit, Berisha thekson se kjo është beteja për shpëtimin e Partisë Demokratike dhe të Shqipërisë nga pazaret e Lulzim Bashës dhe Edi Ramës
Ndërkohë në kuadër të zhvillimeve në PD, kryetari i kësaj force politike Lulzim Basha ka udhëtuar mbrëmjen e së hënës drejt Fierit, ku është takuar me drejtuesit e degës lokale të PD-së dhe anëtarësinë e partisë.
Mendohet se temë e diskutimit me strukturat atje ka qenë sqarimi i bazës së partisë në lidhje me vendimin për përjashtimin e Sali Berishës nga grupi parlamentar, por edhe vazhdimi i aksionit opozitar pas rikthimit të PD-së në parlament.
