Enkelejd Alibeaj, kryetari i komanduar i PD-së, nuk e njeh vendimin e Gjykatës së Tiranës, që njohu sot Komisionin e Rithemelimit, si organ drejtues të kësaj force politike.
Alibeaj e cilësoi vendimin skandaloz, dhe tha se do të apelohet, ndërkohë që sa i takon veprimeve politike, ai tha se njëra palë e bëri hapin e saj, duke iu referuar dorëheqjes së Lulzim Bashës.
Alibeaj tha se të njëjtën gjë presin demokratët dhe nga Berisha, duke folur në emër të tyre.
Deklarata e plotë:
Brenda afatit 15 ditor ne kemi të drejtë që të paraqesim një ankim, ju e dini që vendimi merr formë të prerë, vetëm pas shqyrtimit në Gjykatën e Apelit. Atëherë pyetja e parë që do të bënim është, nëse vendimi i sot është apo jo i ekzekutueshëm, vendimi bëhet i ekzekutueshëm, vetëm nëse nuk ankimohet, ose nëse është shprehur Gjykata e Apelit.
Ne do të presim Gjykatën e Apelit. E vërtetë është një gjë, ne nuk kemi qenë palë në proces, dh vendimi është nul, e drejta e ankimimit është kushtetuese, ja kaq e thjeshtë. Do të jap një sqarim të fundit, sot flasim për një çështje juridike, politikisht aktet tona janë shumë të qarta, ne kemi bërë hapat tona për bashkimin, zoti Basha ka bërë hapin e vetë, presim që lëvizja përballë të jetë simetrike.
