Prej katër ditësh ka nisur vaksinimi masiv në sheshin “Skënderbej”. Të moshuar qëndrojnë në radhë pranë çadrave në sheshin “Skënderbej” për të bërë dozën e vaksinës kineze “Sinovac’, e cila është vënë në dispozicion për të gjithe qytetaret e moshës së tretë, nga mosha 70 vjeç e lart.
Të moshuarit nuk kundërshtojnë bërjen e vaksinës por nuk janë të kënaqur me qëndrimin në radhë për shkak dhe të moshës së tyre të thyer.
“Më lajmëroi mbrëmë mjeku i familjes dhe na tha shkoni në mëngjes zini radhën. Do të presim, se kush ikën e vjen prapë. Pleqëria nuk bën dot punë të vejë e të vijë, unë jam në Kinostudio” thotë një nënë.
Ka dhe të moshuar që kanë durim. “Për një ditë nuk do të vdesim ne!” thotë një nënë tjetër duke qeshur.
20 mije vaksina te tjera
Ndërkohë ministrja e Shëndetësisë, Ogerta Manastirliu ka bërë me dije se brenda muajit prill do të vijnë edhe 20 mijë doza të vaksinës Pfizer.
“Presim nga kontrata me kompaninë Pfizer të kemi sërish përgjatë muajit prill rreth 20 mijë doza. Brenda javës së parë presim 7 mijë dozat e para, e më tej deri në datë 19 prill 20 mijë doza. Ndërkohë që presim që të lëvrohen edhe sipas kalendarit të lëvrimit dhe pjesa tjetër e dozave Sinovac”, bëri me dije Manastirliu.
Për tre ditë radhazi janë kryer mbi 50 mijë vaksinime dhe procesi do të vijojë në qendrat e përqendruara por edhe qendrat shëndetësore kudo në vend.
Shqipëria ka marrë një numer te madh vaksinash Sinovac nga Turqia dhe ka marrë 20% të vaksinave, nga 1 milion doza që pritet të mbërrijnë.
Nga fillimi i procesit të vaksinimit janë kryer 119,321 vaksinime.
Ora news
