Kryeministri Edi Rama ka prezantuar këtë të dielë (5 tetor) platformën online të komunikimit brenda Partisë Socialiste. Sipas tij, kjo do të lidhë në kohë reale të gjithë anëtarët e PS-së për të biseduar mbi mbarëvajtjen e partisë. Rama tha se ky do të jetë mekanizmi kryesor për vlerësimin e kandidatëve për deputetë në çdo qark.
Por gjatë bashkëbisedimit me gazetarët, kryeministri Edi Rama nuk i kurseu as sulmet ndaj presidentit Ilir Meta.
Sipas tij, Meta është shef i shtabit elektoral të Opozitës, ndërsa mërzitja tregon se do të humbasin zgjedhjet.
Edi Rama: “Më vjen shumë keq por është fakt që Ilir Meta është shveshur plotësisht nga roli i Presidentit tashmë dhe është zhytur i gjithi në një fushatë politike për të shpëtuar nga falimentimi ShPK-në siç e ka përcaktuar Lulzim Basha, të Monikës. Mos prisni asgjë tjetër nga Ilir Meta deri më 25 prill përveç përshkallëzimit të retorikës që na turpëron të gjithë ne. Ilir Meta është thjesht kryetari i Shtabit Elektoral të opozitës që përdor zyrën e Presidentit të Republikës,
Më i mërzitur nga të gjithë është Ilir Meta. Do të humbë thellë kësaj here. Ilir Meta i është borxhli më shumë këtij vendi. E ka bërë kryeministër, kryetar Parlamenti dhe President. Çfarë do ky njeri që nuk rri rehat. Edhe pozicioni ku qëndron është pozicion i zgjedhur për të qenë i treti i vërteti“.
Ditët e fundit, tonet mes presidentit dhe mazhorancës, kryesisht kryeministrin Rama, janë ashpërsuar me kreun e shtetit që kaa lëshuar një sërë akuzash të rënda ndaj shumicës dhe kreut të saj. /A.R, OraNews
