Italia do të dërgojë një ekip mjekësh ushtarakë drejt Kosovës në ndihmë të stafit mjekësor përballë betejës me koronavirusin.
Këtë e ka bërë të ditur Ministria e Punëve të Jashtme dhe Diasporës në faqen e saj zyrtare.
Ministrja Meliza Haradinaj Stublla zhvilloi një bisedë telefonike me homologun e saj italian Luigi Di Maio.
“Ministri Di Maio më konfirmoi që do të dërgojë një ekip ushtarak-mjekësor nga Italia në ndihmë Kosovës në luftën anti-COVID-19, dhe për këtë akt fisnik, e falënderova përzemërsisht”, tha kryediplomatja e Kosovës.
Gjithashtu gjatë kësaj telefonate, ministrat biseduan dhe për çështjen e vizave në Kosovë teksa ministrja Haradinaj Stublla i kërkoi Di Maios mbështetje për të drejtën e vendit për lëvizjen pa viza, tani që me të drejtë qytetarët presin përmbylljen e këtij procesi.
Më herët Italia ka dërguar një taskforcë edhe në Shqipëri për të asistuar në luftën kundër pandemisë.
(Foto ilustruese)
Ora news
