Komisioni Europian i njohu zyrtarisht vendet anëtare me kuadrin negociues për Shqipërinë si dhe progres raportin. Tani, dokumenti që përcakton procedurën e negociatave, duhet të miratohet nga secili vend dhe më tej do të paraqitet zyrtarisht nga presidenca gjermane. Komisioni e ka mbajtur sekret dokumentin, por paraprakisht thotë se ai është i ngjashëm si për Shqipërinë ashtu dhe Maqedoninë Veriore.
Pas pritjes së gjatë, kuadri i negociatave midis Shqipërisë dhe Bashkimit Europian u prezantua zyrtarisht në Këshill nga Komisioni Europian. Dokumenti që përmban udhëzimet dhe parimet e bisedimeve të pranimit është i ndarë në tre pjesë: 1) parimet që rregullojnë negociatat e pranimit, 2) përmbajtjen e negociatave dhe 3) procedurën e negociatave.
Dokumenti pritej në Këshill që gjatë muajit mars, por u paraqit zyrtarisht pasi kryesimin e radhës e mori Gjermania.
Pasi të rishikohet dhe miratohet nga secili vend anëtar, presidenca gjermane do ta paraqesë kuadrin negociues në konferencën e parë ndërqeveritare, por deri atëherë Tirana zyrtare duhet të plotësojë disa kushte.
Deri tani Komisioni Europian nuk ka komentuar përmbajtjen e dokumentit.
“Ne nuk mund të paragjykojmë procesin e rishikimit të kuadrit negociues nga vendet anëtare,” tha një zëdhënës duke shtuar se dokumenti është i ngjashëm si për Shqipërinë ashtu dhe për Maqedoninë Veriore, por merr parasysh specifikat e secilit vend.
Një zëdhënës i presidencës gjermane konfirmoi se kuadri negocies si dhe progres raporti për Shqipërinë dhe Maqedoninë Veriore u janë prezantuar nga Komisioni 27 ambasadorëve të vendeve anëtare të bllokut.
Mbetet me interes përmbajtja e progres raportit, apo vlerësimet vjetore dhe rekomandimet që Komisioni Europian bën për Shqipërinë.
Gjithsesi, deri në konferencën e parë ndërqeveritare të negociatave midis Shqipërisë dhe Bashkimit Europian, Tirana zyrtare duhet të plotësojë disa kushte, si miratimin me konsensus të reformës zgjedhore, plotësimin e vendeve vakante në Gjykatën e Lartë dhe atë Kushtetuese si dhe vazhdimin e luftës ndaj krimit të organizuar dhe korrupsionit.
/Ora News.tv/
