Kryeministri Edi Rama njoftoi sot zero tolerancë ndaj çdo grumbullimi, qoftë edhe politik, si dhe paralajmëroi penalitete ndaj bizneseve dhe qytetarëve që nuk respektojnë protokollet e sigurisë në hapësirat publike.
“Pasi kam folur gjerë e gjatë me ekspertët dhe Ministren e Shëndetësisë gjithë këto ditë, ju bëj me dije se: e para, nuk do të lejojmë më në asnjë mënyrë asnjë lloj grumbullimi, qoftë edhe politik. Vazhdoni punën, liria e lëvizjes është e garantuar, liria e shprehjes nuk ka qenë kurrë e diskutuar, por grumbullime më shumë sesa numri i personave të lejuar nga protokollet e sigurisë nuk do të lejohen më”, tha Rama.
Kryeministri theksoi se “Policia e Shtetit duhet dhe do ta bëjë detyrën pa bërë më asnjë dallim ndaj kujtdo qoftë, në çdo kilometër katror të Republikës së Shqipërisë”.
“Kush merr pjesë në grumbullime apo grupime më të mëdha sesa numrat e lejuara nga protokollet e sigurisë do të penalizohet drejtpërdrejt individualisht”, tha Rama.
Po ashtu, ai theksoi se “bizneset që nuk respektojnë protokollet e sigurisë nuk do të tolerohen më. U kujtoj të gjithë atyre që kanë një biznes se përveç gjobave, rrezikojnë edhe heqjen e lirisë nëse kapen në shkelje të protokolleve duke rrezikuar drejtpërdrejt shëndetin e njerëzve që u shërbejnë”.
Nga ana tjetër, Rama tha se “qytetarët do të vijojnë të qarkullojnë lirisht pa kufizime e pa autorizime të asnjë lloji, por do të penalizohen nëse kapen me shkelje të rregullave të thjeshta të distancimit social në hapësirat e përbashkëta publike”.
“Kështu nuk vazhdohet më tutje, nëse nuk duam të vrasim me papërgjegjshmërinë e indiferencës ndaj rregullave për t’ia dalë mbanë ndaj kësaj lufte më të moshuarit e të dobëtit fizikisht mes nesh. Kush thotë akoma nuk ka virus, nuk e ka ditur asnjëherë çfarë flet, por sot kur të gjithë po e shohim si po rishfaqet më kërcënues sesa dukej më parë rreziku i një skenari katastrofik duhet thjesht të zbatojmë rregullat. Virusi nuk ka këmbë, por përdor këmbët e budallikut njerëzor. Për budallikun nuk ka rrugë tjetër veç tolerancës zero”, tha Rama.
atsh
