Kryetari i grupit parlamentar të Partisë Socialiste, Taulant Balla tha sot se “pas konstituimit të Asamblesë Kombëtare fillon një proces konsultimi me anëtarësinë e partisë për emrat e përfaqësuesve të Partisë Socialiste në zgjedhjet e ardhshme”.
“Partia Socialiste e Shqipërisë e ka të përcaktuar qartë axhendën për të gjitha proceset e brendshme demokratike që lidhen me zgjedhjet e pranverës së ardhshme”, u shpreh Balla, në një prononcim për mediet nga kryesia e Kuvendit.
Balla tha se “procesi është politik dhe programor dhe do të konkludojë me fitoren në zgjedhjet e vitit të ardhshëm”.
“PS do të zhvillojë proces përgatitor me diferencë me partitë e tjera politike. Jemi partia më e madhe në vend dhe partia më e madhe në hapësirën mbarëshqiptare dhe në javën në vijim pa dyshim me mbledhjen e Asamblesë Kombëtare, konstituimin e saj, do të bëjmë me dije të gjitha detajet. Në shtator-dhjetor ne kemi një proces të rëndësishëm konstituimi me anëtarësinë dhe për çështje programore”, tha Balla.
Lidhur me ndryshimet në Kodin Zgjedhor, Balla tha se “çdo gjë është gati pas miratimit të ndryshimeve kushtetuese”. “Hapja e listave është një vendim i marrë pa kthim, është vendosur në librin më të rëndësishëm, siç është Kushtetuta. Të gjitha çështjet që lidhet me adresimin në Kodin Zgjedhor i konsideroj tepër të thjeshta në kuptimin e gjetjes së modaliteteve për të përkthyer ndryshimet Kushtetuese në Kodin Zgjedhor. Ne kemi rënë dakord me nevojën që ky proces të zhvillohet menjëherë, ndërkohë që Kuvendi nis sesionin në 7 shtator”, tha Balla.
Ai tha se Kodi Zgjedhor është miratuar me konsensus të plotë të opozitës jashtëparlamentare.
“Marrëveshjen e 5 qershorit, ne e respektuam, e miratuam dhe jemi të gatshëm ta implementojmë fjalë për fjalë e germë për germë. Ky është një proces tejet transparent. Respektimi i marrëveshjes së 5 qershorit është tejet transparent. Zv.komisioneri i KQZ-së i takon opozitës. Nuk gjej dot asnjë alibi të Bashës për të mos marrë pjesë në këtë proces. Kemi lënë një vend për opozitën që t’i heqim çdo lloj alibie Lulzim Bashës që, largqoftë, të mendojë të mos marrë pjesë në zgjedhje. Zgjedhjet janë instrumenti më i rëndësishëm në demokraci dhe kushdo që mundohet të gjejë alibi për të mos marrë pjesë në zgjedhje e ka marrë përgjigjen edhe në 30 qershor, edhe në raste të tjera. Ky proces do të zhvillohet në mënyrë konsultuese me opozitën dhe ende nuk kam dyshime nëse do marri apo jo pjesë, është vendimmarrja e tyre”, tha Balla. /atsh
