Mjekja pediatre Gjeorgjina Kuli, njëkohësisht anëtare e Komitetit Teknik të Ekspertëve, deklaroi se maska është një nga mjetet mbrojtëse edhe për fëmijët.
Sipas saj është e rekomandueshme mbajtja e maskës, duke filluar nga mosha 6 vjeç e sipër.
“Maska është një nga mjetet mbrojtëse shumë të rëndësishme edhe për fëmijët e vegjël. Mosha e rekomandueshme që fëmijët të mbajnë maskë është 6 vjeç e sipër.Sepse është një moshë që fëmijëve mund t’u shpjegohet për rëndësinë e maskës, për faktin pse duhet mbajtur dhe po kështu mund të kombinohet në formë lojërash apo maska me personazhe të përrallave apo të botës së tyre, për ta bërë atë pjesë të rëndësishme të jetës së përditshme”, tha Kuli.
Në videomesazhin e shpërndarë nga Ministrja e Shëndetësisë Ogerta Manastirliu , Kule thotë se maska është një mjet i hershëm i mbrojtjes ndaj sëmundjeve infektive dhe që ka vërtetuar prej kohës efikasitetin e tij.
“Maska është një mjet i vjetër mbrojtës ndaj shumë sëmundjeve infektive dhe i domosdoshëm për sëmundje që përhapen me anë të spërklave të ajrit apo sëmundjeve aerogene. Nuk është një mjet i ri. Thjesht po vëmë në përdorim një mjet që ka ekzistuar prej kohës dhe që ka vërtetuar prej kohësh efikasitetin e tij”, u shpreh Kuli.
/abcnews.al/
