Tre të rinj me incialet S.Z., 23 vjeç, E.Z., 18 vjeç dhe R.Ç, 31 vjeç, të tre banues në Tiranë, janë vënë në pranga pasi akuzohen për veprën penale “Plagosje e rëndë me dashje e kryer në bashkëpunim”.
Sipas njoftimit zyrtar nga Policia e Tiranës, mësohet se tre të arrestuarit në rrugën “Mihal Grameno”, me datë 9 gusht të këtij viti, pas një konflikti të çastit, për motive të dobëta kanë goditur me sende të forta një person me inicialet K.H.. Ky i fundit edhe pse ka kaluar më shumë se një muaj pas ngjarjes ndodhet ende i shtruar në spitalin e Traumës ku po merr ndihmën e nevojshme mjekësore për shkak të plagëve të rëndë.
Njoftimi i policisë Tiranë. Zbardhet dhe dokumentohet ngjarja e ndodhur me datë 09.08.2020, ku mbeti i dëmtuar me sende të forta një shtetas. Finalizohet nga Komisariati i Policisë Nr.1, operacioni i koduar “Kombinimi”. Kapen dhe ndalohen 3 shtetas, autorë të dyshuar të ngjarjes, të shpallur në kërkim për veprën penale “Plagosje e rëndë me dashje e kryer në bashkëpunim”. Si rezultat i një punë të mirorganizuar dhe të pandërprerë për dokumentimin dhe kapjen e autorëve të kësaj ngjarjeje, nga Komisariati i Policisë Nr.1 u zhvillua operacioni Policor “Kombinimi”, në kuadër të të cilit u bë i mundur, kapja dhe ndalimi i autorëve të dyshuar të kësaj ngjarjeje, konkretisht : S.Z., 23 vjeç, E.Z., 18 vjeç dhe R.Ç, 31 vjeç, të tre banues në Tiranë. Këta shtetas, në bashkëpunim me njëri-tjetrin, në rrugën “Mihal Grameno”, me date 09.08.2020, pas një konflikti të çastit, për motive të dobëta kanë goditur me sende të forta shtetasin K.H., i cili ndodhet aktualisht i shtruar në spitalin e Traumës. Materialet i kaluan Prokurorisë së Rrethit Gjyqësor Tiranë, për veprime të mëtejshme.
(f.m/dosja.al)
