Ura e Darzezës në Fier është shembur dhe si pasojë një mjet i tonazhit të rëndë ka rënë në lumë.
Burime bëjnë me dije për Faxweb.al se drejtuesi i mjetit të tonazhit të rëndë ka mbetur i lënduar, dhe është ndihmuar nga banorët e zonës për të dalë jashtë makinës.
Gjendja e urës prej kohësh ka qenë e amortizuar dhe në disa raste banorët kanë ngritur shqetësimin dhe në Fax News, po kërkesa e tyre për ndërhyrje ka rënë në vesh të shurdhët.
Sipas informacioneve të siguruara nga gazetarja Fatmira Bajramaj, shkak për shembjen e urës është bërë një kamion i tonazhit të rëndë që ka kaluar mbi të. Kjo ka bërë që ura të shembej, pasi mjeti i tonazhit të rëndë e kalonte peshën që ura e kishte të përcaktuar për të mbajtur.
Shembja e urës, ndërpret edhe komunikimin e banorëve të fshatit me fshatrat e tjerë të zonës, ndërkohë që ndodh në momentin kur sapo ishte hapur sezoni turistik, duke sjellë edhe dëmtim të bizneseve që ndodhen në këtë zonë.
