Ndërsa në Tiranë ka nisur vaksinimi kundër Covid-it i personaliteteve mbi 80 vjeç, kryeministri Rama nga Elbasani tha se kjo është vetëm një simbolikë dhe respekt ndaj tyre pasi vaksinimi do të vijojë edhe me 80-vjeçarë të tjerë, njerëz të zakonshëm.
Rama: Bëhet fjalë për të filluar vaksinimin e 80-vjeçarëve me disa personalitete që janë 80 vjeçarë për të dhënë një mesazh solidariteti me ta, një mesazh përkujdesje për ta. E vë re dhe me një farë sekëlldie që kur këta njerëz ndahen nga jeta ka një moment lotderdhje dhe një moment rrjedhje fjalësh e fjalimesh për ta që nuk ma ha mendja që do të dukeshin më bukur nëse ne do të duhej të përballeshim me humbjen e ndonjërit prej tyre për shkak të mungesës së vaksinës, nga ana tjetër dhe për të shfrytëzuar pozitivisht imazhin dhe influencën e tyre te njerëzit në kushtet kur vaksinimi është një fushatë kudo. Vaksinimi ka dhe një aspekt tjetër që është sensibizilimi dhe lehtësimi i barrës psikologjike i atyre që dyshojnë te vaksina apo mendojnë se vaksina është e dëmshme apo produkt i një konspiracioni botëror për të eleminuar njerëzimin e të tjera marrëzira si këto. Fillojmë me kategorinë e 80-vjeçarëve dhe janë të parët në mënyrë simbolikë sepse do të vazhdojë dhe me njerëz të zakonshëm.
Reagimet lidhur me diferencimin, Rama i cilësoi të padenja dhe mizerabël. Sipas shefit të qeverisë, dozat e vaksinave që do të shkojnë për personalitetet në peshën e përgjithshme të volumit të vaksinave që do të bëhen, janë disa pika uji në det.
Rama:Është bërë një reagim shumë i padenjë, shumë mizerabël lidhur me këtë nga njerëz që kanë mundësi të komunikojnë me publikun dhe e shpërdorojnë në mënyrë të rëndomtë këtë mundësi duke u përpjekur që edhe këtë rast ta shfrytëzojnë për të shfryrë mllefin ndaj qeverisë, ndaj meje por kjo nuk është e denjë edhe sikur të bëhej fjalë për disa njerëz që mbase nuk ishin 80, po 79 apo 78, por njerëz që i kanë dhënë kësaj shoqërie, njerëz që kanë kontribuar dhe sakrifikuar për të krijuar vlera në këtë shoqëri, unë nuk besoj se do të ishte e denjë të ngrihet e gjithë kjo stuhi në gotë kur bëhet fjalë për disa dhjetëra persona që në peshën e përgjithshme të volumit të vaksinave që do të bëhen janë disa pika uji në det.
ora tv
