Gjykata e Apelit të Posaçëm ka pranuar kërkesën e prokurorisë për rikthimin në hetim dhe në gjykim të çështjes penale ndaj Fatmir Mediut në lidhje me ngjarjen e Gërdecit.
Në njoftimin zyrtar thuhet se seanca u zhvillua me kërkesë të trashëgimtarëve të viktimës Erison Durda ku Gjykata e Apelit vendosi të ndryshojë vendimin e shkallës së parë, duke pranuar kërkesën për ti kthyer aktet Prokurorit të Posaçëm për të proceduar.
“Me referimin në parashikimin e pikës 1, shkronja b), të nenit 46, të ligjit 98/2016 “Për Organizimin e Pushtetit Gjyqësor në Republikën e Shqipërisë” si dhe, në interesin e treguar nga media, komunikohet në mënyrë të përmbledhur se, sot më datë 24.09.2021, në Gjykatën e Posaçme të Apelit për Korrupsionin dhe Krimin e Organizuar, mbi ankimin e Prokurorit të Posaçëm dhe të trashëgimtarëve të viktimës E.D., u zhvillua seanca gjyqësore në dhomë këshillimi, për çështjen penale nr. 212 akti, datë 03.09.2021 regjistrimi, ku Gjykata vendosi, të ndryshojë vendimin nr. 60, datë 27.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar, duke pranuar kërkesën e Prokurorit të Posaçëm dhe revokoi vendimin e pushimit nr. 6, datë 14.09.2009 të Kolegjit Penal të Gjykatës së Lartë, duke i kthyer aktet Prokurorit të Posaçëm për të proceduar” thuhet në njoftimin për mediat të Apelit të Posaçëm.
Shkalla e parë vendosi ta refuzojë kërkesën, por SPAK kërkon që ish-ministri i Mbrojtjes Fatmir Mediu të gjykohet për shpërdorim detyre ne lidhje me tragjedinë e Gërdecit.
Nëna e 7-vjeçarit që humbi jetën nga shpërthimi i vitit 2008 në Gërdec, kishte bërë padi në Prokurorinë e Posaçme SPAK, duke kërkuar rihetimin e çështjes me argumentin se Gjykata e Lartë kishte pushuar padrejtësisht çështjen e parë ndaj ish-ministrit të Mbrojtjes Fatmir Mediu.
Kjo kërkesë u refuzua nga gjykata e shkallës së parë, por SPAK nuk ishte dakord dhe vendosi ta dërgojë çështjen në Gjykatën e Apelit.
Kjo e fundit ka pranuar kërkesën e organit të akuzës për ta kaluar çështjen në rihetim.
Prokuroria e Posaçme SPAK, tha për RTV Ora se do të njihet me përmbajtjen e vendimit të Apelit për të vendosur më pas mënyrën si do të veprohet.
Më 27 korrik Gjykata e Posaçme për Korrupsionin dhe Krimin e Organizuar rrëzoi kërkesën e prokurorisë për rifillimin e hetimeve për Mediun, lidhur me tragjedinë e Gërdecit që shkatoi 26 të vdekur e qindra të plagosur, 15 mars 2008, me argumentin se ka kaluar afati 10-vjeçar i ndjekjes penale dhe rrjedhimisht çështja duhet te pushohet, por SPAK nuk u tërhoq duke e çuar çështjen në Apel.
Ora news
