Nga ora 09:00 e mëngjesit të sotëm pritet që të rinisë fluturimi i avionëve me qytetarë nga aeroporti i Rinasit, pas dy ditëve në kolaps si pasojë e përplasjes së kontrollorëve të AlbControll me qeverinë shqiptare, që çoi në burgosjen e tre prej tyre, dhe me largimin e përkohshëm nga puna të dhjetra të tjerëve.
Ka qenë ministrja Belinda Balluku ajo që ka bërë me dije pas mesnate se do të rinisë transporti ajror i udhëtarëve, një pjesë e të cilëve bëjnë me dije burimet tashmë kanë nisur check-in në Rinas.
Fluturimet e para që parashikohen të bëhen paraditen e sotme, të konfirmuara dhe nga TIA janë ai me Bolonjën e Italisë apo me Brukselin, ndërsa ende mbetet për tu konfirmuar se nga kush do të bëhet puna e kontrollorëve në kullën e vrojtimit.
Gjatë ditës së djeshme u fol se një pjesë e tyre kanë ardhur nga Turqia, ndërsa në mbrëmje kryeministri Edi Rama tha se do të kthehen në punë një pjesë e kontrollorëve shqiptarë, të cilët kishin shpallur paaftësinë e përkohshme për punë, pas shkarkimit të disa prej kolegëve të tyre, dhe përgjysmimit të pagave prej më shumë se një viti.
Në një reagim të bërë publik gjatë ditës së djeshme Eurocontrol nuk komentoi lëvizjet e palës shqiptare, por u kujdes të saktësonte se në hapësirën shqiptare nuk do të dërgoheshin avionë, sa kohë që situata ishte e pasigurt.
Kjo çështje u shndërrua dhe në një skenë përplasjesh politike, ku kryeministri Edi Rama, pa u shkëputur asnjë ditë nga fushata, për të gjetur një zgjidhje, bënte fajtor për këtë ”grusht shteti” ish-kryeministrin Sali Berisha dhe presidentin Ilir Meta.
(E.K/Faxweb.al)
