Një 33-vjeçar është arrestuar nga Policia e Durrësit pasi disa javë më parë ka qëlluar me armë zjarri në ajër. (Lexo këtu) Mësohet se bëhet fjalë për Alvaro Strefin, i cili më 2 korrik, pas një konflikti nxorri armën dhe qëlloi në ajër.
I riu nga Shijaku qëlloi ndaj dy personave të tjerë, të identifikuar me inicialet F. T., 18 vjeç dhe Sh. T., 24 vjeç. 33-vjeçari akuzohet për vrasje të mbetur në tentativë dhe armëmbajtje pa leje, shkelje për të cilat rrezikon deri në 7 vjet heqje lirie.
NJOFTIMI I PLOTË:
Durrës
Qëlloi me armë zjarri pistoletë në ajër, pas një konflikti për motive të dobëta, dhe u largua nga vendngjarja, kapet dhe ndalohet autori i ngjarjes së ndodhur më datë 02.07.2020, në lagjen nr. 13, Plazh.
Vihet në pranga 33-vjeçari i shpallur në kërkim për veprat penale “Vrasja me dashje e mbetur në tentativë” dhe “Armëmbajtja pa leje”.
Shërbimet e DVP Durrës, në bashkëpunim me Komisariatin e Policisë Shijak, në vijim të punës për kapjen e personave në kërkim dhe vënien e autorëve përpara përgjegjësisë penale, ndaluan shtetasin A. V., 33 vjeç, banues në Shijak, Durrës.
Ky shtetas dyshohet se më datë 02.07.2020, në lagjen nr. 13, Plazh, Durrës, pas një konflikti për motive të dobëta, ka qëlluar me armë zjarri, në drejtim të shtetasve F. T., 18 vjeç dhe Sh. T., 24 vjeç, banues në Durrës dhe më pas ka hedhur armën e zjarrit në tokë dhe është larguar me shpejtësi për t’i shpëtuar kapjes nga Policia.
Materialet i kaluan Prokurorisë së Rrethit Gjyqësor Durrës, për veprat penale “Vrasja me dashje e mbetur në tentativë” dhe “Armëmbajtje pa leje”, për të cilën parashikohet dënimi me burgim deri në 7 vjet.
(k.m/dosja.al)
