Shqipëria është përfshirë nga moti i keq, ku gjatë natës nuk kanë munguar edhe shirat e rrëmbyeshëm. Vetëm pak minuta shi kanë mjaftuar që të përmbyten disa lagje të qyteteve të vendit.
Mëngjesin e sotëm qyteti i Lushnjes është “zgjuar” nën ujë. Mësohet se nga shirat e rrëmbyeshëm që kanë rënë gjatë natës kanë përmbytur disa akse kryesore të qytetit. Ndërkohë në qytet janë krijuar edhe radhë të gjata makinash.
Foto nga përmbytjet në Lezhë:
Po kështu, nga shirat janë përmbytur edhe disa lagje të qytetit të Lezhës. Në lagjet “11Janari” dhe në lagjen “Besëlidhja” uji ka arritur në disa centimetra dhe makinat kanë vështirësi në lëvizje. Në këto rrugë kanë shpërthyer edhe ujërat e zeza dhe e gjithë kjo problematikë vjen si pasojë e mos pastrimeve të kanaleve kulluese në qytetin e Lezhës.
Ndërsa në qytetin Kukësit, në mungesë të burimeve ujore dhe thatësirës, reshjet me intensitet të lartë kanë sjellë rritje të nivelit të ujit.
Madje është rritur edhe niveli i ujit në liqenin e Fierzës. Aktualisht Fierza është në nivelin 277m, ndërsa furnizimi me ujë i banoreve të qytetit është 3 orë në ditë, nga 10-20 minuta që ishte si pasojë e mungesës së reshjeve gjatë verës.
J.V/Dosja.al
