Prokurori Enver Krasniqi që po i hetonte tri prej rasteve më të bujshme në vend – vjedhjen e 2.1 milionëve nga Thesari i Shtetit, Listën e Veteranëve dhe çështjen e Kasafortës në Presidencë – ka vdekur mbrëmjen e djeshme, teksa po luante futboll, në lagjen “Arbëria” në Prishtinë.
Mësohet se prokurori Krasniqi kishte qenë duke luajtur me miqtë e tij nga Prokuroria dhe disa policë, derisa kjo nuk ishte hera e parë që shkonte në këtë vend pasi aty luante futboll tash e pesë vjet.
Burime të Klan Kosova thonë se ai e kishte caktuar vetë terminin e lojës së sotme të futbollit dhe kishte insistuar disa herë që ta formonte ekipin.
Krasniqi megjithatë lojën nuk e çoi deri në fund, pasi pati probleme shëndetësore qysh në pesë minutat e parë të ndeshjes ku edhe kishte rënë për tokë e ku i kishin shkuar për ndihmë miqtë e tij dhe më pas kishin ardhur edhe ekipet mjekësore.
E gjithë ngjarja është filmuar nga kamerat e sigurisë, derisa në vend të ngjarjes ka shkuar edhe Kryeprokurori i Shtetit Aleksandër Lumezi.
Ministri në detyrë i Drejtësisë, Selim Selimi, përmes një postimi në Facebook i ka shprehur ngushëllime familjes dhe bashkëpunëtorëve.
“Me keqardhje kuptova lajmin për ndarjen nga jeta të prokurorit të Prokurorisë Speciale, Enver Krasniqi, i cili me dinjitet dhe profesionalizëm të lartë i ka shërbyer sistemit të drejtësisë”, ka shkruar ai.
© SYRI.net
