Tire Alldervishaj, sanitarja e Shefqet Ndroqit, e cila i mori 8 milion lekë një vajze që të përkujdesej për mamnë e saj ka apeluar vendimin e shkallës së parë ditën e premte, duke kërkuar lirinë.
55-vjeçarja ka depozituar kërkesën në Gjykatën e Apelit nëpërmjet avokates së saj mbrojtëse, ku kërkon masë më të butë sigurie. Ndërkohë, që gjykata nuk ka cakatuar ende datën për zhvillimin e kësaj seance.
Kërkesa për lirimin e 55-vjecares është bërë me argumentin se ajo sa ka kaluar COVID-19, dhe nuk është negativizuar ende, ndërkohë që prej disa javësh në vendin tonë nuk bëhet më testi i dytë për negativizimin, dhe periudha e izolimit në rast infektimi me koronavirus është 10 ditë.
Sanitarja akuzohet për “mashtrim më shumë se një herë”, dhe dyshohet në bashkëpunim, por nga materiali referues që policia i ka dërguar prokurorisë nuk rezultojnë ende të zbardhur emra të tjerë. Fax news ka mësuar se në lidhje me këtë ngjarje të rëndë, nën hetim janë vënë edhe 4 punonjës të spitalit “Shefqet Ndroqi”. Në ditët në vijim prokuroria pritet që të marrë në pyetje disa persona, punonjës në spitalin “Shefqet Ndroqi”.
Sipas informacioneve që Fax news ka siguruar nga prokuroria, ka mësuar se mes personave që do merren në pyetje nga do të jenë edhe mjekë e infermier të këtij spitali, i kthyer prej muajsh në spitalin COVID-2. Tire Alldërvishi, u vu në pranga, pasi duke u hequr si infermiere mashtroi një 30- vjeçare, vajza e një pacienteje me Covid-19, që po trajtohej në spitalin “Shefqet Ndroqi”.
Ajo arriti ti merrte të resë rreth 8 milionë lekë të vjetra, me pretendimin se do kujdesej për nënën e saj. Burime thanë se vajza e të ndjerës ka bërë denoncimin në polici, disa orë përpara se të transmetoheshin pamjet në një emision investigativ. Përveç pamjeve të emisionit të transmetuar mbremjen e së martës, policia ka sekuestruar edhe disa kamera sigurie pranë spitalit “Shefqet Ndroqi”, që konfirmojnë takimin e vajzës me sanitaren.
(E.K/Faxweb.al)
