Gati një muaj nga nisja e vitit të ri shkollor duket se ende nuk është e qartë se si do të zhvillohet mësimi.
Ndërkohë nxënësve, prindërve dhe mësuesve u është dërguar një formular për të zgjedhur një alternativë të mësimdhënies, ndërkohë për ‘Ora News’ prindër dhe nxënës deklarojnë se janë pro mësimit në klasa.
Shkolla pritet të nisë përsëri në shtator, por situata pandemike e bënë të paqartë mënyrën se si do të zhvillohet procesi.
Mësuesve, prindërve dhe nxënësve u është vënë në dispozicion një pyetësor ku u kërkohet të zgjedhin një nga alternativat e zhvillimi të mësimit.
Në 4 alternativat e paraqitura përfshihet edhe zhvillimi i mësimit në kushte normale por duke zbatuar masat e higjenës dhe mbajtjes së maskës.
Gjithashtu kjo kategori mund të zgjedhë edhe variantin e klasave me grupe të vogla për të siguruar distancimin fizik.
Dy alternativat e tjera përfshijën mësimin online dhe mësimin e koordinuar mes mësimit në distancë dhe atij në klasa.
Pjesa më e madhe e qytetarëve të pyetur nga ‘Ora News’ thonë se janë pro zhvillimit të mësimit në klasa por duke respektuar masat anti covid.
”Edhe fëmijët mërziten, më mirë të shkojnë. Ka 40 nxënës, 20 në mëngjes, 20 mbasdite. Duhet të shkojnë në klasa. Të merren masa.”
Lidhur me alternativën online, rezultatet e vitit që lamë pas bënë që këto kategori të mos e zgjedhin, duke thënë se mësimi në distancë nuk ishte efektiv.
”Në klasa se nuk më pëlqen mësimi online, nuk është efektiv. E mira është të kthehen në shkollë, por varet. Nga e keqja, detyrohen të bëjnë mësim online.”
Kjo situatë shihet me problem edhe nga specialitet e arsimit të cilët thonë se ministria është shumë vonë me përgatitjet.
