Drejtori i Policisë së Shtetit Muhamet Rrumbullaku ka thirrur në takim disa përfaqësues të Partisë Demokratike. Mësohet se Rrumbullaku do të japë arsyet e refuzimit të kërkesës për zhvillimin e protestës së 6 dhjetorit nga opozita.
Një
nga përfaqësuesit e PD-së, Çlirim Gjata ka thënë për mediat se protesta është e drejtë, kushtetuese e paqësore dhe nuk do të ndalet për asnjë arsye.
Ai pohon se do jetë një protestë që do t’u tregojë partnerëve ndërkombëtarë për korrupsionin që po bën kjo qeveri. “Policia do të jetë në thyerje të rëndë të Kushtetutës dhe të akteve ndërkombëtare për të drejtën e protestës. Do i tregojë të gjithë partnerëve ndërkombëtar që unë nuk jam një polici e një vendi demokratik, jam polici në shërbim të një njeriu, të pushtetit të një njeriu dhe këtë gjë do ta kuptojnë të gjithë partnerët ndërkombëtarë që do të vijnë atë ditë. Ne do të bëjmë protestën tonë paqësore”-tha Gjata.
Kujtojme se disa ditë më parë, Policia e Shtetit vendosi të pengojë protestën e thirrur nga Berisha më 6 dhjetor, pikërisht ditën kur 27 liderët e vendeve të BE-së do të mblidhen në Tiranë. Në një dokument zyrtar, drejtori Lorenc Panganika tha se nuk do të bëhet asnjë lëvizje siç ishte parashikuar, ndryshe shkelësit do të ndëshkohen me masa administrave dhe penale. Kjo protestë sipas policisë përbën rrezik për sigurinë kombëtare dhe atë publike.
