Gjykata e Korçës ka lënë në masën e sigurisë “arrest në shtëpi” 46-vjeçaren nga Mirasi i Devollit, Irena Zeria, e cila u arrestua për shkak se është dënuar në shtetin grek për vrasjen e vajzës së saj 9-muajshe.
Ngjarja ka ndodhur në vitin 1995, ndërsa gruaja u arratis nga spitali psikiatrik në vitin 1997. Gjykata ka vendosur të lërë në arrest shtëpie gruan 46-vjeçare për shkak të gjendjes së saj mendore, pasi ajo është diagnostikuar me çrregullim bipolar psikotiok, një diagnozë për të cilën trajtohet edhe me pagë invaliditeti.
”S’mbaj mend asgjë, s’kam vrarë fëmijë, mua fëmija më ra nga dora. Edhe nga spitali nuk e di si kam dalë”, është shprehur ajo.
Një prej banoreve të fshatit Miras të Devollit, ka hedhur poshtë akuzat për Irena Zerian, e cila është dënuar me 20 vite burg për vrasjen e vajzës së saj 9-muajshe.
Në një prononcim për BW, fqinja e 46-vjeçares tha se Irena është një grua dhe nënë e shkëlqyer. Sipas saj, gjithçka ka qenë aksidentale dhe se vajza e saj ishte mbytur nga një mollë dhe se nuk e kishte vrarë nëna, siç pretendon drejtësia greke.
“Irena është grua e përsosur. Shumë e mirë është. Ne bëmë 30 vite këtu. Është grua e shkëlqyer, nënë e mirë. Nuk arrihet. Si çdo familje, shkoi në emigrim. Lindi fëmijë. Fëmija po hante një mollë. Ka qenë e ngarkuar psikologjikisht. Ajo rendi t’ia heqë mollën që kishte futur në gojë. Ngjarja ka ndodhur aksidentalisht, ua them unë pasi unë kam pirë një kafe me të kur u qetësua dhe u ambientua. Lindi dy fëmijë. Burri më shumë rri në Greqi, kush i rriti fëmijët?! Vajzën e ka në universitet, djalin po ashtu, kush ia rriti, unë?! Joo… por edukata e saj”, tha fqinja e saj.
© SYRI.net
