Nuredin Dumani shkoi në Elbasan për të vrarë por ra në pritë dhe më pas në prangat e policisë që e kërkonte për një seri vrasjesh. Detaje të reja dalin në dritë për arrestimin dhe veprimtarinë e të shumëkërkuarit që ishte kthyer në “Hije” prej disa vitesh.
Nuredin Dumani dyshohet se ishte në Elbasan pasditen e së martës, 29 mars, për të kryer një atentat.
Por misioni kriminal besohet se ishte dekonspiruar dhe “Hija”, siç njihet ai në botën e krimit, ishte shitur nga persona të besuar tek rivalët.
Në fshatin Papër, ai ra pre e një sulmi me breshëri arme zjarri ndërsa udhëtonte me makinën që shikoni në video, jo shumë larg vendit, ku ka ndodhur edhe dy krime për të cilat Dumani është i dyshuar.
Dyshimet janë se atentati mund të jetë vazhdim i përplasjes me ish- mikun Talo Çela, por ky i fundit thuhet se nuk ka qenë vetë i pranishëm.
Me një plumb në trup, ai ka braktisur makinën në mes të rrugës dhe humbi gurmët.
Disa orë më pas, policia e lokalizoi në një pallat në lagjen “Apolonia” në Fier, aty ku e vunë në pranga nga forcat Speciale RENEA.
Bashkë me të u shoqërua edhe një vajzë e re dhe 40-vjeçari Henrik Hoxhaj.
Ky i fundit u kap me pistoletë në brez dhe besohet se është njeriu që transportoi Dumanin pas atentatit në Elbasan drejt Fierit ku ai kishte ngritur një strehë sigurie. Aty u gjetën edhe armë.
Nuredin Dumani u kap pas kësaj dere që edhe këtë të mërkurë ruhet me polici, ndërsa shtëpinë e kishte marrë prej disa ditësh me qira.
Prej mbrëmjes së të martës, Nuredin Dumani ndodhet në Spitalin e Traumës, ku mësohet se do ti nënshtrohet një ndërhyrje kirugjikale për një plagë në mushkëri.
Nuredin Dumani ishte kthyer në një prej personazheve më të rrezikshnme dhe dyshohet u përfshirë në të paktën 7 vrasje.
Ai ishte krahu i djathtë i Talo Çelës që po ashtu kërkohet për disa krime, ndërsa lufta mes tyre besohet se ka si shkak ndarjen e parave të vjedhura në aeropoprtin e Rinasit.
