Edhe pse grumbullimet janë të ndaluara për shkak të situatës së krijuar me COVID, si pasojë e rritjes rekord të numrave të të infektuarve, rreth 20 studentë pa maska dhe distancim fizik u mblodhën për të protestuar.
TIRANE-Një grup studentësh pjesë e Lëvizjes për Universitetin u mblodhën për të protestuar paraditen e sotme përpara godinës së Ministrisë së Arsimit. Edhe pse grumbullimet janë të ndaluara për shkak të situatës së krijuar me COVID, si pasojë e rritjes rekord të numrave të të infektuarve, rreth 20 studentë pa maska dhe distancim fizik u mblodhën për të protestuar.
Studentët kërkojnë anulimin e tarifës vjetore me argumentin se nuk kanë pse ta paguajnë pasi për shkak të koronavirusit, por edhe tërmetit tragjik më shumë se gjysmën e vitit akademik nuk kanë qenë në auditore. Madje, ata kanë bërë edhe një peticion duke mbledhur, sipas tyre 8 mijë firma.
Studentët i kanë lënë afat ministrisë që të përgjigjet për një javë, në të kundërt paralajmërojnë rezistencë. Policia bëri thirrje me megafon që të shpërndahen pasi tubimet janë të ndaluara, ndërsa më pas i shpërndau.
Në ambientet e ministrisë hyri njëri nga studentët për të dorëzuar kërkesat. Deri tani Filologjiku ka vendosur që tarifa të shtyhet për në shtator, fakultetet e tjera nuk kanë bërë asnjë lëvizje, ndërsa studentët kërkojnë anulimin. Zv/ ministri i Arsimit Olti Rrumbullaku doli nga zyra duke iu drejtuar se nuk është e nevojshme për peticion, por nuk dha shpjegime se cfarë do të bëhet.
Pesë arsyet sipas studentëve pse duhet të anulohet tarifa:
1. Jemi tre muaj pa punë, ne dhe prindërit
2. Mbi gjysmën e vitit akademik nuk kemi qenë në fakultete
3. Mësimi online ka qenë i paplotë dhe diskriminues
4. Kemi tarifat më të larta në rajon dhe buxhetin më të ulët
5. Jemi lodhur duke paguar shtrenjtë për gjithçka (libra, strehim, transport, ushqim, etj)
Shqiptarja.com
